ABD prezidenti Donald Trump eki afta içinde Amerika Birleşken Devletleri İranğa darbe endirecekmi qarar berecek. Amerika prezidentiniñ beyanatını Beyaz saraynıñ matbuat kâtibi Karoline Leavitt brifingde bildirdi.
«Yaqın kelecekte İrannen olacaq ya da olmaycaq muzakerelerniñ büyük ihtimali bar olğanına esaslanıp, yaqın eki afta içinde qarar alacam», – dep bildirdi Leavitt ABD prezidentiniñ aytqanlarını.
The Wall Street Journal malümatına köre, Trump ABDniñ İranğa darbe planını tasdıqladı, amma emir bermedi. ABD prezidenti üyken yardımcılarına ücüm planına qoltuta, amma Tehran özek programmasından vazgeçermi dep baqmaq içün şimdilik ondan uzaq tuta, dep haber etti.
İyünniñ 17-de ABC News telekanalı haber etti ki, yaqın 24-48 saat İrannen zıddiyetniñ diplomatik yolnen çezilmesi mümkünmi ya da ABD cenk areketlerine başlamağa mecbur olacağını belgilemek içün pek müim olacaq.
İrannıñ Yuqarı lideri Ayatolla Ali Hamenei iyünniñ 18-nde televizion çıqışında amerikalılar «İranğa qarşı er bir cenk qarışuvı, şübhesiz, olarğa tüzetilmez zarar ketirecegini» aqıllarında tutmaq kerekler, dep ayttı.
ABDniñ 47-nci prezidenti müim qararlar qabul etmek içün kerek olğan vaqıt olaraq eki afta aqqında birinci kere aytmay. İyünniñ 12-nde Donald Trumpnıñ bu beyanatından eki ayta keçti: «Eki afta içinde Putin bizni aldatamı belli olacaq». ABD prezidenti bunı mayısnıñ 28-nde Rusiye prezidenti Vladimir Putinniñ Ukrayinağa qarşı cenkni kerçekten de bitirmege niyeti barmı-yoqmı köstermek içün ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.