Qırımda Rusiye uquq qoruyıcıları Saq rayonında demiryolda rele dolaplarını yaqqanından şübheli olğan eki adamnı tuttı. Bu aqta Rusiye kütleviy haber vastaları FSBniñ Qırım ve Aqyar idaresiniñ matbuat hızmetine esaslanıp bildirdi.
Tutulğan Saq rayonı ve Kezlev sakinlerini Ukrayina Mudafaa Nazirliginiñ Baş istihbarat idaresi messencer yardımınen celp etti, dep iddia etile. Al-azırda erkekler eki ayğa apiske alındı ve Rusiye Federatsiyası Ceza kodeksiniñ 205-inci maddesine (terror areketi) istinaden cinaiy dava açıldı.
Tutulğanlarnıñ ad ve soyadları aydınlatılmay, açıq izaatlar da yoq. Ukrayina Mudafaa nazirliginiñ Baş istihbarat idaresi de bu haberlerni izaatlamadı. Qabaatları isbatlansa, 20 yılğa qadar apis cezası berile bile.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.