İyünniñ 20-ne keçer gecesi Rusiye ordusı Ukrayinağa 86 Shahed darbe uçucısızınen ve çeşit taqlit uçucısızlarnen ücüm etti, dep haber ete Ukrayina Silâlı Quvetleriniñ Ava küçleri. Darbeler Rusiyeniñ Millerovo, Kursk, Orel, Brânsk, Primorsko-Ahtarsk yönelişlerinden ve işğal etilgen Qırımdaki Çavda burnundan uçurıldı.
Ukrayina Silâlı Quvetleriniñ Ava küçleri yazğanına köre, Ukrayina arbiyleri 70 dronnı zararsız alğa ketirdi.
Qayd etilgenine köre, Rusiye uçucısızları memleketniñ şimali, şarqı ve cenübinde zararsızlaştırıldı: 34-ü ateş darbe vastalarınen urıp tüşürildi, 36-sı radioelektron küreş vastalarınen coyuldı.
Ukrayina Silâlı quvetleriniñ malümatına köre, duşmannıñ ava darbesi sekiz yerde endirildi, 11 yerde parçalar tüşti.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.