Ukrayina ve Rusiye iyünniñ 20-nde cenk esirlerini deñişti – bu afta ekinci kere. Bu aqta Rusiye agentlikleri haber etti, Rusiye Mudafaa nazirligi ve Ukrayina prezidenti Volodımır Zelenskıy ve Ukrayina Koordinatsion ştabı bunı tasdıqladılar.
Agentlikler yaralanğanlarnıñ sanitar deñişüvleri oldı, dep yaza.
Zelenskıy azat etilgen Ukrayina arbiyleriniñ çoqusı eki yıldan ziyade esirlikte olğanını yaza. Olarnıñ arasında Mariupol qorçalayıcıları, Silâlı Quvetler, Milliy gvardiya ve Sıñır hızmetiniñ arbiyleri bar.
Cenk esirlerine yanaşuv koordinatsion ştabı bildire ki, «ağır yaralanğan ve ağır hasta» kategoriyasından esirler azat etildi:
«İstanbuldaki añlaşmalarğa köre, Cenk esirlerine yanaşuv koordinatsion ştabı Ukrayina prezidentiniñ emrinen ağır yaralanğan ve ciddiy sağlıq problemleri olğan daa bir İmayeciler gruppasını Rusiye apsinden qaytardı».
Azat etilgen insanlarnıñ sayısı kene aydınlatılmay. Derc etilgen videoda bir qaç on Rusiye arbiyi bar. İstanbulda añlaşılğan deñişüvler başlağan keçken aftadan berli taraflar bir-birine bir qaç yüz insannı teslim etti. Lâkin tam sayısı bütün deñişüvler yekünlengen soñ belli olacaq. Deñişüvler 1:1 olaraq keçe. Umumen er taraftan biñ kişiden ziyade deñiştirile bile. Ukrayina prezidenti Volodımır Zelenskıy deñişüvler iyünniñ 20-21-nde yekünlene bile, dep aytqan edi.
Bu afta iyünniñ başında İstanbulda añlaşılğan elâk olğanlarnıñ cesedleri deñiştirildi. Rusiye Ukrayinağa tahminen 6 biñ ceset, Ukrayina Rusiyege ise bir qaç on insannı berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
